ಮೈಸೂರು ಅಭಿವೃದ್ಧಿಗಾಗಿ 300ಕ್ಕೂ ಹೆಚ್ಚು ಯೋಜನೆಗಳ ಸಲ್ಲಿಕೆ : ಮಾರ್ಚ್ 23ರಂದು ಗ್ರ್ಯಾಂಡ್ ಫಿನಾಲೆ
ಮೈಸೂರು, ಮಾ.14: ನಗರದ ಪ್ರತಿಷ್ಠಿತ ಎಸ್ಡಿಎಮ್ ಇನ್ಸ್ಟಿಟ್ಯೂಟ್ ಫಾರ್ ಮ್ಯಾನೇಜ್ಮೆಂಟ್ ಡೆವಲಪ್ಮೆಂಟ್ (SDMIMD) ವತಿಯಿಂದ ವಿದ್ಯಾರ್ಥಿಗಳ ನೇತೃತ್ವದಲ್ಲಿ ಆಯೋಜಿಸಿರುವ ‘ವಿಶನ್ ಮೈಸೂರು–2050’ ಯೋಜನೆಗೆ ಸಲ್ಲಿಕೆಯಾದ ಪ್ರಸ್ತಾಪಗಳ ಮೌಲ್ಯಮಾಪನ ಪ್ರಕ್ರಿಯೆ ಇಂದು ಸಂಸ್ಥೆಯ ಕ್ಯಾಂಪಸ್ನಲ್ಲಿ ಆರಂಭಗೊಂಡಿತು.
ಮೈಸೂರಿನ ಭವಿಷ್ಯದ ಅಭಿವೃದ್ಧಿಗೆ ದೀರ್ಘಕಾಲೀನ ನೀಲನಕ್ಷೆ ರೂಪಿಸುವ ಉದ್ದೇಶದಿಂದ ಈ ಕಾರ್ಯಕ್ರಮ ಹಮ್ಮಿಕೊಳ್ಳಲಾಗಿದೆ. ನಾಗರಿಕರು, ವಿದ್ಯಾರ್ಥಿಗಳು, ವೃತ್ತಿಪರರು ಹಾಗೂ ವಿವಿಧ ಸಂಘ ಸಂಸ್ಥೆಗಳು ತಮ್ಮ ಅಭಿಪ್ರಾಯಗಳು ಮತ್ತು ಯೋಜನೆಗಳನ್ನು ಸಲ್ಲಿಸಿ ಅಭೂತಪೂರ್ವ ಪ್ರತಿಕ್ರಿಯೆ ನೀಡಿದ್ದಾರೆ. ಮೈಸೂರಿನ ಸಮಗ್ರ ಅಭಿವೃದ್ಧಿಗಾಗಿ 300ಕ್ಕೂ ಹೆಚ್ಚು ಯೋಜನೆಗಳು ಹಾಗೂ ಪ್ರಸ್ತಾಪಗಳು ಬಂದಿದ್ದು, ಅವುಗಳಲ್ಲಿ ಪ್ರಾಥಮಿಕ ಪರಿಶೀಲನೆಯ ಬಳಿಕ 172 ಉತ್ತಮ ಯೋಜನೆಗಳನ್ನು ಶಾರ್ಟ್ಲಿಸ್ಟ್ ಮಾಡಲಾಗಿದೆ.
ಸಂಸ್ಥೆಯ ಸಹಾಯಕ ಪ್ರಾಧ್ಯಾಪಕ ಸುನಿಲ್ ಎಂ.ವಿ. ಮಾತನಾಡಿ, “ಮೈಸೂರಿನ ನಾಗರಿಕರ ದಿನನಿತ್ಯದ ಅವಲೋಕನಗಳನ್ನು ತರ್ಕಬದ್ಧ ಯೋಜನೆಗಳಾಗಿ ರೂಪಿಸಿ, ಅವುಗಳನ್ನು ಪರಿಷ್ಕರಿಸಿ ನಗರದ ಅಭಿವೃದ್ಧಿಗೆ ಸಮಗ್ರ ದಿಕ್ಕು ನೀಡುವುದು ‘ವಿಶನ್ ಮೈಸೂರು–2050’ ಕಾರ್ಯಕ್ರಮದ ಮುಖ್ಯ ಉದ್ದೇಶ. ನಾಗರಿಕರನ್ನು ಒಗ್ಗೂಡಿಸುವ ನಿಷ್ಪಕ್ಷಪಾತ ಚಿಂತಕರ ವೇದಿಕೆ ನಿರ್ಮಿಸುವುದೂ ಇದರ ಪ್ರಮುಖ ಗುರಿಯಾಗಿದೆ” ಎಂದು ಹೇಳಿದರು.
ನಗರಾಭಿವೃದ್ಧಿಯ ವಿವಿಧ ಕ್ಷೇತ್ರಗಳನ್ನು ಒಳಗೊಂಡಂತೆ ಯೋಜನೆಗಳು ಸಲ್ಲಿಕೆಯಾಗಿವೆ. ಅವುಗಳಲ್ಲಿ ಅರ್ಬನ್ ಇನ್ಫ್ರಾಸ್ಟ್ರಕ್ಚರ್ ಮತ್ತು ಮೊಬಿಲಿಟಿ, ಪರಿಸರ ಸ್ಥಿರತೆ, ಆರ್ಥಿಕ ಅಭಿವೃದ್ಧಿ, ಡಿಜಿಟಲ್ ಗವರ್ನನ್ಸ್ ಮತ್ತು ಸ್ಮಾರ್ಟ್ ಸಿಟಿ, ಶಿಕ್ಷಣ ಮತ್ತು ಆರೋಗ್ಯ ಸೇವೆ, ಪರಂಪರೆ ಸಂರಕ್ಷಣೆ, ಸಾಮಾಜಿಕ ಸಮಾನತೆ, ವಿಪತ್ತು ನಿರ್ವಹಣೆ, ಪ್ರವಾಸೋದ್ಯಮ ಮತ್ತು ಸಂಸ್ಕೃತಿ ಮುಂತಾದ ವಿಷಯಗಳಿಗೆ ಸಂಬಂಧಿಸಿದ ಪ್ರಸ್ತಾಪಗಳು ಪ್ರಮುಖವಾಗಿವೆ.
ರಕ್ಷಣಾ ಕ್ಷೇತ್ರ, ಪರಂಪರೆ ಸಂರಕ್ಷಣೆ, ತಂತ್ರಜ್ಞಾನ, ಶಿಕ್ಷಣ ಹಾಗೂ ಕಾರ್ಪೊರೇಟ್ ಕ್ಷೇತ್ರದ ಅನುಭವಿ ತಜ್ಞರನ್ನು ಒಳಗೊಂಡ ಜ್ಯೂರಿ ಪ್ಯಾನೆಲ್ ಯೋಜನೆಗಳ ನೈಜತೆ, ಕಾರ್ಯಸಾಧ್ಯತೆ ಹಾಗೂ ಪ್ರಸ್ತುತತೆ ಆಧಾರವಾಗಿ ಮೌಲ್ಯಮಾಪನ ಮಾಡುತ್ತಿದೆ. ಮೈಸೂರಿನ ಇತಿಹಾಸ ಹಾಗೂ ನಗರಾಭಿವೃದ್ಧಿ ಅಗತ್ಯಗಳ ಬಗ್ಗೆ ಆಳವಾದ ತಿಳುವಳಿಕೆ ಹೊಂದಿರುವ ವಿಷಯತಜ್ಞರು ಈ ಪ್ರಕ್ರಿಯೆಯಲ್ಲಿ ಭಾಗಿಯಾಗಿದ್ದಾರೆ.
ಎಲ್ಲಾ ಯೋಜನೆಗಳ ಪೈಕಿ ಐದು ಅತ್ಯುತ್ತಮ ಯೋಜನೆಗಳು ಮಾರ್ಚ್ 23ರಂದು ನಡೆಯುವ ‘ವಿಶನ್ ಮೈಸೂರು–2050’ ಗ್ರ್ಯಾಂಡ್ ಫಿನಾಲೆಗೆ ಆಯ್ಕೆಯಾಗಲಿವೆ. ಶಾರ್ಟ್ಲಿಸ್ಟ್ ಆದ ತಂಡಗಳಿಗೆ ಮೈಸೂರು ಜಿಲ್ಲಾ ಆಡಳಿತಾಧಿಕಾರಿಗಳು ಮತ್ತು ವಿಷಯತಜ್ಞರ ಮುಂದೆ ತಮ್ಮ ಯೋಜನೆಗಳನ್ನು ಪ್ರಸ್ತುತಪಡಿಸುವ ಅವಕಾಶ ದೊರೆಯಲಿದೆ. ಅಂತಿಮವಾಗಿ ತಜ್ಞರ ಸಮಿತಿ ಮೂರು ಅತ್ಯುತ್ತಮ ತಂಡಗಳನ್ನು ವಿಜೇತರಾಗಿ ಘೋಷಿಸಲಿದೆ.
ವಿಜೇತ ತಂಡಗಳಿಗೆ ಉನ್ನತ ಮಟ್ಟದ ಸರ್ಕಾರಿ ಅಧಿಕಾರಿಗಳು, ಕೈಗಾರಿಕೋದ್ಯಮಿಗಳು ಮತ್ತು ಶಿಕ್ಷಣ ತಜ್ಞರ ಮುಂದೆ ತಮ್ಮ ಯೋಜನೆಗಳನ್ನು ಮಂಡಿಸುವ ಅವಕಾಶ ಸಿಗಲಿದ್ದು, ಫೈನಲಿಸ್ಟ್ ತಂಡಗಳ ಆಯ್ಕೆಯಾದ ಯೋಜನೆಗಳನ್ನು ‘ಶ್ವೇತಪತ್ರ’ ರೂಪದಲ್ಲಿ ಸರ್ಕಾರಕ್ಕೆ ಸಲ್ಲಿಸಲು ನಿರ್ಧರಿಸಲಾಗಿದೆ.
ಮೈಸೂರು ನಗರದ ಭವಿಷ್ಯವನ್ನು ಸುಸ್ಥಿರ ಹಾಗೂ ಸಮಗ್ರವಾಗಿ ರೂಪಿಸುವ ಉದ್ದೇಶದಿಂದ ರೂಪುಗೊಂಡಿರುವ ‘ವಿಶನ್ ಮೈಸೂರು–2050’ ಕಾರ್ಯಕ್ರಮವು ನಾಗರಿಕರ ಜ್ಞಾನ, ಆವಿಷ್ಕಾರ ಸಾಮರ್ಥ್ಯ ಮತ್ತು ಸಾಮಾಜಿಕ ಜವಾಬ್ದಾರಿಯನ್ನು ಒಗ್ಗೂಡಿಸುವ ಮಹತ್ವದ ವೇದಿಕೆಯಾಗಲಿದೆ ಎಂದು ಆಯೋಜಕರು ತಿಳಿಸಿದ್ದಾರೆ.
